దేశంలోనే అత్యంత చవకైన బీమా పాలసీని IRCTC అందిస్తోంది. ఈ పాలసీని కేవలం 45 పైసలకే కొనుగోలు చేయవచ్చు, తద్వారా రూ.10 లక్షల వరకు బీమా కవరేజీ లభిస్తుంది. ఈ బీమా పాలసీని రైలు ప్రయాణ సమయంలో మాత్రమే కొనుగోలు చేయగలరు. రైలు టిక్కెట్‌ను బుక్ చేసినప్పుడు, దానితో పాటు ప్రయాణ బీమా పాలసీ కూడా వర్తిస్తుంది. రైలు ప్రయాణ సమయంలో అనుకోని ప్రమాదం సంభవించి పాలసీ హోల్డర్‌ మరణిస్తే లేదా తీవ్రంగా గాయపడినట్లయితే ఈ పాలసీ ఉపయోగపడుతుంది.
ఇంతకు ముందు ఈ పాలసీ 35 పైసలకు మాత్రమే అందుబాటులో ఉండగా, ఇప్పుడు దాని ధర 45 పైసలకు పెరిగింది. అయినప్పటికీ, ఇది దేశంలోనే చవకైన బీమా పాలసీగా గుర్తింపు తెచ్చుకుంది. వాస్తవానికి, ఈ బీమా పాలసీ కొన్ని గంటలు లేదా రోజుల పాటు మాత్రమే చెల్లుబాటు అవుతుంది. అంటే, ట్రైన్‌ టిక్కెట్‌తో పాటు ఈ బీమా పాలసీని కొనుగోలు చేసిన తర్వాత రైలులో ప్రయాణిస్తున్న కాలానికి మాత్రమే ఇది చెల్లుబాటు అవుతుంది. ప్రయాణికులు గమ్యస్థానానికి చేరుకోగానే పాలసీ ఆటోమేటిక్‌గా రద్దవుతుంది.
